越剧《九斤姑娘》唱词

越剧唱词《九斤姑娘·智斗》

（九唱）才道才道真才道，一些勿错是娑婆貂。

（婆白）省哉，息哉。娑婆貂。侬阿里来个？阿里来个？

（九唱）我格祖父会起早，挑挑担子乡下跑。从日出走到月上梢，同月亮婆婆结相好。送来一根娑婆貂，东藏西藏藏勿牢。上勒镬铲柄上刚刚好，一把镬铲就成宝。镬铲拿来一记甩，一镬清水变镬饭。镬铲拿来一记戳，一镬萝卜会变肉。镬铲拿来一记丢，一碗清水变碗酒。镬铲拿来一记铲，铲出盘甘四样。鱼、虾、蟹、酱、腊鸡、腊白鲞，糟鸡、糟鸭、糟肚肠，黄鳝、泥鳅不算帐，田螺、螺蛳凑两样，萝卜、芋艿、苋菜梗，外加一碗霉千张。镬铲拿来炒一炒，一生一世吃不了。

（婆唱）倒糟倒糟真倒糟，我猢狲骷髅自家套。就算侬根娑婆貂，也勿及我只金丝猫。

（九唱）我把镬铲世上少，徽州朝奉取过宝。铜钿还过六千吊，六千铜钿我勿卖掉。赔侬一只金丝猫，铜钿除去三千吊。侬赔我的娑婆二抽貂，六千吊铜钿勿好少。三千吊铜钿拿来找，万事全体倒罢了；侬三千吊铜钱勿来找，我搭侬到众家祠堂去跑一跑。前邻后舍叫来一大淘，请出家长太公张福高。我要侬在众人面前来跪倒，我再告发侬个女头脑，偷食猫硬说是金丝猫，赶上门来竹杠敲，说得大家心火冒，赶走侬只奇怪刁。侬只好日里沿街把饭计，夜里住宿在破庙。东南西北四处飘，罚侬倒大路，侬格尸首无人料。

（婆唱）勿得了来勿得了，我今朝碰着个大好佬。伊格口才比我好，格场相骂勿好讨。

（癞唱）叫声三叔婆奇怪刁，侬只猫猫我知道。前村有个黄猫猫，哪里会变金丝猫？

（九唱）叫声看牛小哥陆阿毛，侬搭我前邻后舍叫一叫。

（婆唱）叫声姑娘九斤佬，我只勿是金丝猫，侬也勿是娑婆貂，大家拿来和和掉。

（九白）噢，

（唱）侬只勿是金丝猫，我根是真正格娑婆二抽貂。侬眼睛勿要连（眨眨），侬还我一只黄毛鸭；侬遍身勿要连抖抖，还我一只宽口斗；双脚勿要连顿顿，侬还我一根断杆秤；头皮勿要连搔搔，还我娑婆二抽貂。

（婆唱）竹杠是侬叫我敲，侬想逃来慢慢交。

越剧唱词《九斤姑娘·九只桶》

吕瑞英饰九斤姑娘，张桂凤饰石二佬，吴天芳饰张箍桶，张秋萍饿三叔婆，吉玉英饰小癞子

（石唱）出了一座五市门，三眼龙门过一层。前面有点闹盈盈，后面有些冷清清。再过一座擂鼓门，门前两个管门人。伊立要立在黄泥墩，十七八把笤帚倒头顶。胡须出在当头颈，身体好象排竹棍，日里勿要饭来吃，夜里勿要眠床困，就是我石家管门人。

（石唱）天亮要箍天亮桶，晏昼要箍午时桶。日落西山黄昏桶，半夜三更要紧桶。要箍有盖无底桶，要箍有底无盖桶。还要箍只直笼统、两只耳朵翘耸耸。外加一对恩恩爱爱夫妻桶，还要箍只奇怪桶，一根尾巴通天空，一根横档上当中。上头一记松，下头扑隆咚，拎拎起来满桶桶，我问侬张师傅懂勿懂？

（张唱）只听伊讲桶桶桶，弄得我一点也不懂。