败子回头金不换

越剧《败子回头金不换》 剧本唱词败子回头金不换 周伧楚口述 选自:《落地唱书》/张继舜搜集整理，浙江文艺出版社，1992年3月 东村有个赵大宝， 阿爸姆妈死得早， 从小呒人来管教， 年纪轻轻走邪道。 嘴巴馋得像只猫， 嬉嬉荡荡专门搞， 屋里垃圾三寸高， 白花气，嘭嘭交， 哪怕田水就要燥， 伊也勿去瞧一瞧。 天亮爬起日头三丈高， 眼屙结得好像绿豆糕。 夜饭吃落打虎跳， 赌场里头充好佬： 注龙、牌九、摸十八， 搓麻将来押牌宝， 起码半夜头鸡啼， 有时还要打通宵。 上代遗产给伊倒勿少， 伊赌赌吃吃统卖掉。 唉！赵大宝呀赵大宝， 格几日，灶前空空呒柴烧， 水缸翻转好戴帽， 米甏摸去空荡荡， 害得灶司菩萨也要逃。 铜钿银子断断燥， 肚皮饿得咕咕叫。 心想去做三只手， 只怕抓牢被人拷； 也想跟人做强盗， 又怕老命来送掉， 六斤四两保勿牢。 左思右想呒办法， 介末叫伊哪格好? 哎，隔壁有个毛老嫂， 养着一只大花猫， 一日到夜喵喵叫。 (夹白：哦，有了) 想法把伊抓来填肚饱。 伊当作老鼠吱吱叫， 哄过花猫来抓牢， 拿过一把破薄刀， 剥落猫皮去卖掉， 买来一斤愈风烧， 猫肉燉得喷鼻香， 配配烧酒吱落吱落味道实在好！ 哎，勿知哪个快嘴佬， 格桩事体来传到， 毛老嫂跳起三尺高， 起早天亮就发炮： “斩头猢狲杀千刀， 脸皮要用尿布包， 真是好比‘黄烂蚕’， 好吃懒做天下少。 千人痛骂万人厌， 一生一世要倒灶。 侬吃了我格大花猫， 根根肚肠要烂掉， 日后总要瘫床死， 尸体必定抛荒郊， 老鹰拖，野狗咬， 骨头拆散当柴烧。 若勿赔我大花猫， 侬去做鬼也勿饶。” 三餐六顿统要骂， 夜里骂到三更敲。 第二天，操起砧板和薄刀， 指名道姓又来吵， 骂得“黄烂蚕”， 坐勿牢来困勿好， 好比蚂蚁上热灶。 想来想去呒办法， 伊卷起裤脚噔噔噔噔只好逃！ 一逃逃啦天台到， 天台地方实在好， 青青山，绿水绕， 国清禅寺人人晓。 去讨饭，怕难看， 只得去学剃头佬， 一日到夜手勿歇， 夜里还要打凉帽， 格种地方蹲勿牢， 伊卷起裤脚噔噔噔噔又要逃。 一逃逃啦永康到， 永康地方实在好， 方岩风光天下少， 胡公大帝人人晓。 为了生活呒办法， 只得去学铁匠把榔头敲， 理沙吉，补茶壶， 唉，介种生活也难熬， 敲敲榔头手骨酸， 铲铲簿刀闪痛腰， 拉起风箱呼呼叫， 脸孔熏得像老包， 鼻头像格烟囱灶， 双手可比鸡脚爪， 衣裳好像烧炭佬。 格种生活吃勿消， 伊卷起裤脚噔噔噔噔又要逃。 一逃逃啦东阳到， 东阳地方实在好， 玉山头顶白云飘， 黄杨木雕人人晓。 要肚饱，呒办法， 只得去学砂糖换鸡毛， 销货担，肩上挑， 跑得脚底会起泡， 脚酸手热勿用讲， 有时还要把气淘， 价钱要还低， 还讲伊货色有假冒， 鸡毛烂烂湿， 砂糖又嫌少， 唉，格种生意勿内交， 伊卷起裤脚噔噔噔噔又要逃。 一逃逃啦诸暨到， 诸暨地方实在好， 苎萝村里出西施， 西施美貌人人晓。 新来晚到呒法想， 只好去做打短佬， 当日去割湖田稻， 陷陷落去没裤腰， 浑身弄得糊糟糟， 格种生活吃勿消， 另外呒办法， 伊卷起裤脚噔噔噔噔又要逃。 一逃逃啦富阳到， 富阳地方实在好， 富春江景色如画裱， 鲥鱼美味人人晓。 没法只得做小工， 派伊去烧石灰窑， 伊抬石头背脊像把弯茅刀， 两脚好比踏高跷； 烧烧窑，热皂皂， 汗珠串串像葡萄， 转眼裤腰湿透勿会得燥， 介种生活吃勿消， 伊卷起裤脚噔噔噔噔又要逃！ 东逃逃，勿凑巧， 西逃逃，也勿好， 逃来逃去都勿妙， 肚皮饿得像猪槽， 人末瘦得像猢狲， 想来想去还是回到嵊县好。 剡溪两岸是粮仓， 座座青山都是宝， 看别人，男耕女织多勤劳， 苦一点，日脚过得也味道， 我年纪轻轻苦头吃得也勿少， 手勿烂来脚勿跷， 挑得动来拎得高， 从此后，打定主意要改好。 伊先去做做打短佬， “着啦着啦”种田又割稻， “别啦别啦”斫担柴去把米调， 碰壁之后回心转， 起早落夜劲道高， 省吃俭用不胡闹， 日脚一日要比一日好。 再讲隔壁毛老嫂， 见伊手会提来肩会挑， 待人变得有礼貌， 勿走邪路走正道， 败子回头变得好， 从此“黄烂蚕”绰号勿再叫。 有日仔，家里来了毛老嫂， 话未出口脸带笑： “赵大宝呀赵大宝， 看侬如今变得好， 独人过日也难熬， 问侬老婆要勿要？” 大宝三个勿相信， 急急忙忙开言道： “唉！有侬格个毛老嫂， 哪口歪镬勿要配灶? 哪个菩萨勿要庙? 哪个男人老婆会勿要? 单身汉，多苦恼， 衣裳破了呒人补， 三餐茶饭呒人烧， 只因铜钿银子少， 要讨老婆办勿到。” 毛老嫂，眯眯笑： “西村有个陈彩姣， 前年老公来死掉， 手脚勤快人品好， 只要看得中， 要求也勿高。” 大宝听了喜眉梢， 忙说：“好是好，要也要， 介末劳驾侬帮我前去做月老。” 毛老嫂，手段高， 做起媒人算头挑， 一张嘴巴真灵巧， 死人讲得打虎跳， 岩头讲得也会摇， 舌头尖头会开花， 菩萨也能哄出庙。 前后一月还勿到， 彩姣欢欢喜喜嫁大宝。 提起陈彩姣， 做人实在好， 针线生活样样能， 里里外外勤照料， 大宝再勿困懒觉， 赌场里面勿再跑， 田稻管得刮刮叫， 日子过得蛮蛮好， 一有空，又补路来又修桥， 好事做得真勿少。 男扫帚，女畚斗， 铜钿存起木佬佬， 和和睦睦日脚过， 伊拉是，油麻开花节节高。 两年后，造起三间两居头， 房里傢伙统办好。 第三年，彩姣生个双胞胎， 雪白滚壮像玉雕。 阿囡像彩姣， 儿子似大宝， 两公婆，谢谢毛老嫂， 又送包头又送糕。 全村男女和老小， 人人见了喜心苗， 若还有人提起赵大宝， 个个都将拇指翘。 这真是：败子回头金不换， “黄烂蚕”变成勤力佬。